Дулат Адырбеков Оңтүстік Қазақстан облысындағы әскери кәсібиленген арнайы мектебіне түсіп, оны 1988 жылы бітірген. Сол кездері ол генерал болуды армандаған сыңайлы. Сол жылы Киевтегі М.Ф.Фрунзе атындағы жалпы әскери командалық училищеге түсіп, 1992 жылы командалық-тактикалық мотоатқыш взводы мамандығы бойынша бітірген. 1992-2003 жылдары арнайы взвод командирі, рота командирінің орынбасары, арнайы мақсаттағы жеке рота командирі, республикалық Ұланның оқу батальонының командирі қызметтерін атқарған. Ия, осылайша Дулаттың әскери жұмыстардағы өмір дерегін сырғытып жаза беруге де болар еді. Дегенмен, ауылда өскен ұланның өз міндетіне барынша жауапкершілікпен қарап, елден тыс шет елдерде білім алып, өз қызметіне берілгендегіне риза болмасыңа шара жоқ.Үстіміздегі жылдың 6 мамыр күні Елбасының Жарлығымен Дулат Адырбековке Отанға қалтқысыз қызмет етудің жарқын үлгісін көрсеткені үшін генерал — майор әскери атағы берілді. Бұл үлкен қуаныш. Отырарлықтардың қуанышы, Ш.Қалдаяқов атындағы мектеп-гимназияның қуанышы, Дулаттың әкесі мен анасын сыйлап, қадірлейтін азаматтардың қуанышы. Дулат Темірғалиұлы 2003-2008 жылдары штаб бастығы-республикалық Ұланның бірінші полкы командирінің бірінші орынбасары, штаб бастығы-десанттық-шабуылшы бригадасының командирінің орынбасары, 2008-2013 жылдары Астаналық десанттық-шабуылдаушы бригадасының командирі, Қазақстандық бітімгершілік бригадасының командирі, Құрлық әскерлері оқу орталығының бастығы қызметтерін атқарған. 2013-2015 жылдары — «Отар» 40 әскери базасының бастығы- «Оңтүстік» әскерлер қолбасшысының орынбасары. 2015-2016 жылдары өңірлік әскерлер қолбасшысының орынбасары (жауынгерлік даярлық бойынша)- «Батыс» өңірлік қолбасшысы басқармасы жауынгерлік даярлық бөлімінің бастығы міндеттерін атқарған. 2016 жылдан – бас қолбасшының орынбасары (тыл бойынша) тыл басқармасының бастығы.
Дулат Темірғалиұлы 2000 жылы Қазақстан Республикасы Қарулы Күштерінің әскери академиясын бітірген, 2–ші дәрежелі «Айбын» орденімен және көптеген медальдармен марапатталған ініміз Дулат Темірғалиұлы Адырбековтің өмірдеректері осындай.
Жұмахан Әбдіқадыров,
Отырар ауданының
Құрметті азаматы,
доғарыстағы полиция подполковнигі.
Арманы орындалған ұлан
