Бүгін — OKnews.kz

ТҮРКІСТАНДЫҚ ЖАСТАР ЕҢБЕК АДАМДАРЫНА ЖЫЛУЛЫҚ СЫЙЛАДЫ

OKnews OKnews — Tue, 16 Jan 2024 13:52:02 +0000

Бір топ жастар еңбек адамдарына жылулық сыйлады. Киелі шаһардың тазалығына үлес қосып жүрген 100-ге жуық адамға тегін шәй мен ыстық нан таратты. Аталған іс-шараны Облыстық жастар ресурстық орталығы ұйымдастырған.

Орталық мамандары мен еріктілер қала көшелерінде, аялдамаларда және саябақтарда өткен шараға белсене қатысты. Осылайша тұрғындардың ақ батасын алып қайтты. «Волонтерлер үнемі келіп, көмектесіп тұрады. Қыз-жігіттерге алғысымызды білдіреміз. Мұндай аязды күндері бір шыны-аяқ шайдың өзі денеге де, жүрекке де жылу сыйлайды» деп қала тұрғыны өз тілегін жеткізді.

Айта кетейік, іс-шараның негізгі мақсаты – қоғамда, өскелең ұрпақ арасында мейірімділік, қамқорлық сезімін қалыптастыру, қайырымдылықты насихаттау, жастарды үлкенге құрмет көрсетуге тәрбиелеу. Аяз уақытында қала тұрғындарына және қаланың көркеюіне өз үлестерін қосып, көше тазалығымен айналысып жүрген азаматтарға ыстық шәй ұсынып көңіл бөлу, қызметкерлердің жандарына жылу ұялату.

Түркістан облысы әкімінің баспасөз қызметі

«ABU-DHABI-ге Түркістаннан ұшыңыз

OKnews OKnews — Tue, 16 Jan 2024 12:41:23 +0000

Түркістан қаласындағы «Hazret Sultan» халықаралық әуежайында бағыттардың саны ұлғаюда. Бүгін, 16 қаңтар Түркістан халықаралық әуежайына Әбу-Дәбиден «Wizz Air» әуекомпаниясының Airbus 321 ұшағы келіп қонды. Біріккен Араб Әмірліктерінің танымал туристік қаласынан бағыт алған ұшақта 100 жолаушы 7 экипаж мүшесі болды. Ал, дәл осы күні рухани астана Түркістаннан Әбу-Дәбиге 200 адам аттанды.

Түркістан халықаралық әуежайының Басқарушы директоры Ильяс Нұғмановтың айтуынша, 100 жолаушының 40%-ы шетел азаматтары, яғни туристер. Сол себепті туризмнің дамуына әсері мол.

— Бүгін бірінші рейстің орындалуына байланысты әуежайымызда іс-шара өткізіп отырмыз. 2023 жылдың қараша айынан бастап «Abu-Dhabi — Turkistan» жаңа әуе бағытының ашылатыны және билеттер сатылымға шыққаны туралы хабарлаған едік. Билеттердің бағасы өте қолжетімді. Wizzair.com сайты мен мобильді қосымшасында 19 мың теңгеден, яғни БАӘ-нің 159 дирхамынан басталады. Қос қала арасында саяхат жасауды жоспарлағандар үшін билеттерді алдын ала сатып алуды ұсынамыз. Егер көрсетілген сайтқа тіркеліп, клуб мүшесі атанған жағдайда 10%-ға дейінгі жеңілдіктерді алуға мүмкіндік бар. Рейстер аптаның сейсенбі, бейсенбі және сенбі күндері 3 рет орындалады, — дейді әуежай өкілі.

Әбу-Дәбиден ұшып келген жолаушылардың арасында Үндістан елінің азаматтары өз әсерлерімен бөлісті.

— Мен Дубайда тұратын үндістандықпын. Бүкіл әлемді саяхаттап жүрмін. Бұған дейін Өзбекстан елінде болдым. Мәдениеттеріңіз ұқсас екен. Қазақстанға жұбайыммен бірге 4 күнге келдік. Қай қалаларға баратынымызды әлі шешкен жоқпыз. Қонақ үйге орналасқан соң ойланып, ертең саяхаттауды бастаймыз. Бұл рейстің ашылғаны — менің тағы да осында келуіме мүмкіндік береді. Келесі жолы таулы аймақтарды көретін боламын, — деген Ахмет Баши орналасуға «Керуен сарай» кешенін таңдағанын атап өтті.

«Wizz Air» әуекомпаниясының өкілдері жаңа әуе бағытының іске қосылғанына қуанышты екендерін жеткізді. «ABU-DHABI — TURKISTAN» — әуекомпанияның Қазақстан бойынша іске қосқан үшінші бағыты. Түркістан облысы әкімдігімен іскерлік қарым-қатынасты нығайтып, алдағы уақытта басқа да бағыттарды қосуды жоспарлауда.

Түркістан — биыл Түркі әлемінің туристік астанасы мәртебесіне ие болғаны мәлім. Осыған орай, жыл соңына дейін халықаралық деңгейде түрлі форматта ауқымды іс-шаралар ұйымдастыру көзделуде. Бүгінгі жаңа рейстің ашылуы жағымды жаңалықты еселеп, өңірдің туристік әлеуетін дамытуға ықпал жасайды. Тарихи әрі ежелгі қаланың бүгінгі келбетін көруге асығатындар қатары артып, келушілер саны көбейеді. Жалпы Түркістан халықаралық әуежайы арқылы Стамбул және Эль-Кувейтке, Қазақстан ішінде Астана, Алматы, Қарағанды, Орал, Ақтөбе және Ақтау қалаларына рейстер тұрақты ұшады.

«Open Turkistan» туристік ақпараттық орталығы

ТҮРКІСТАН ОБЛЫСЫ РЕСПУБЛИКАДА БІРКҮНДІК КЕЛУШІЛЕР АРАСЫНДА ТОП-3 БАҒЫТҚА КІРЕДІ

OKnews OKnews — Wed, 29 Nov 2023 18:22:15 +0000

Түркістан облысы біркүндік келушілер арасында ТОП-3 бағытқа кіреді. Одан бөлек сауалнама нәтижелері тағы да қайтып келгісі келетін ТОП-5 бағыттың қатарына енгенін көрсетті. 2022 жылғы статистикаға сәйкес, ел ішінде ең көп саяхаттайтын аймақ ретінде Түркістан өңірі көш бастап, Алматы облысы мен Астана қаласын артта қалдырған. Бұл туралы бүгін TIF’2023 – «Түркістан: Туризм, Инвестиция, Экономика» халықаралық форумы аясында өткен салалық сессияда айтылды.
Туризм индустриясын дамыту жөніндегі панельдік сессияға алыс-жақын шетелден келген спикерлер баяндама жасап, талдауларын ұсынды. Саладағы тәжірибелі тұлғалар мен сарапшылар Қазақстандағы туризмді жан-жақты ілгерілету тәсілдерін талқылады. Сессияның модерторы әрі спикері DARS Consulting (Ұлыбритания) компаниясының директоры, Еуразиядағы BBC Global News коммерциялық өкілдігінің басшысы Сергей Становкин «Аймақтың туристік бренді» тақырыбында сөз қозғады. Контент пен коммуникацияның сапасы, әлеуметтік желімен жұмыс, жарнама жасау бойынша анализ жасалған презентациясын таныстырды.
Түркістан облысы әкімінің орынбасары Бейсен Тәжібаев өңірдің ерекшеліктеріне тоқталып, жоспарлармен бөлісті.
– Түркі халықтарының мәдени және рухани мекені, тарихтан келешекке бағыт алған Түркістан қаласына қош келдіңіздер! Қазақ хандығының 200 жылдай астанасы болған Түркістанның тарихы 1500 жылдан астам уақытты қамтиды. Ал өңір экономикасындағы басым бағыттың бірі туризм саласы болып айқындалған. 2021 жылы Түркітілдес мемлекеттердің ынтымақтастық кеңесінің VIII бейресми саммитінде тараптар Түркістанды түркі әлемінің рухани астанасы деп атау туралы декларацияға қол қойды. Бұл құжат – Түркістанның рухани-мәдени бағытта дамуына оң серпін беріп келеді. Биыл Түркі мемлекеттері ұйымының кеңесуімен Түркістан қаласы – 2024 жылы Түркі мемлекеттерінің туристік астанасы атанды. Бүгінгі мемлекеттік ұйымдардың, туристік қауымдастық өкілдерін, әлеуетті инвесторларды басын біріктірген туризм бағытындағы жоғары деңгейдегі кездесулер мен келісімдер Түркістанға тың серпін береді. Жаңа Түркістан туризм орталығына айналады деп сенемін, – деді Бейсен Дәулетұлы.
«Kazakh Tourism» ҰҚ Басқарушы директоры Даниел Сержанұлы «Туризмдегі коммуникация» тақырыбында пікір білдірді. Саланың мықты және әлсіз жақтарын талдау, мақсатты нарықтардың қолжетімділігі, Орталық Азиядағы тренд, туристік ағындардың алмасуы, әлемдегі жоғары бәсекелестік, елдер арасындағы логистиканың төмендігі, бірыңғай саясаттың болмауы туралы айтты. Спикердің айтуында киелі Түркістан өлкесінің танымалдылығы – Ұлы Жібек жолы турмаршруты негізінде артып келеді. Бұл тұста әлемдік тәжірибені бейімдеу, туристерді қабылдау жүйесін құру, бірыңғай навигация жүйесі, турмаршрут сертификаты, цифрландыру мен геймификация қызметтерін қолға алу қажет.
Сессия барысында YDA Group бас директоры және директорлар кеңесінің мүшесі Ахмет Хамди Гювенч, Халықаралық туризм және меймандостық университеті Басқарма төрағасының міндетін атқарушы Қарлығаш Аралбекова, кәсіпкер әрі инфлюенсер Омар Сабина, Түркістан облысы мәдениет және туризм басқармасының басшысы Әзімхан Қойлыбаев, «Freedom Finance Global» талдаушысы, салалық зерттеулердің авторы Аңсар Әбуев, «Silk Road» жобасының жетекшісі Айнаш Ерімбетова туристік нарықтың зерттелуі, инфрақұрылым, көлік қатынасы, оқиғалық туризм, қазіргі сын қатерлер мен мүмкіндіктер, кадрлар даярлау жайында пікірлерін ортаға салды. Сессия спикерлер мен қатысушылар арасындағы талқылаумен қорытындыланды.

Түркістан облысы әкімінің баспасөз қызметі

ТҮРКІСТАН ОБЛЫСЫНА ЭКОЛОГИЯЛЫҚ ТУРИЗМ БАҒЫТЫ БОЙЫНША КЕЛУШІЛЕР САНЫ 2 ЕСЕГЕ АРТТЫ

OKnews OKnews — Wed, 29 Nov 2023 18:19:32 +0000

Түркістан облысына келушілер мен саяхатшылар саны жыл өткен сайын артып келеді. Бұл туралы Орталық коммуникациялар қызметінде өткен баспасөз мәслихатында Түркістан облысының әкімі Дархан Сатыбалды мәлімдеді.
– Туризм саласы – өңірдегі басым бағыттардың бірі. Аймақта осы саланы дамыту үшін жан-жақты жұмыс жүргізіліп жатыр. Туризмді дамыту тұжырымдамасын әзірлеу қолға алынды. Туристік әлеует жан-жақты зерттелуде. Шет мемлекеттермен автобус, әуе бағыттары ашылып жатыр. Жуырда Түркі мемлекеттері ұйымына мүше елдердің туризм саласы басшыларының отырысы өтті. Сол жиында Түркістанды түркі әлемінің 2024 жылғы туристік астанасы деп жариялау ұсынысы қолдау тапты. Жұмыстар нәтижесінде биылғы 10 айдың қорытындысымен облысымызға зиярат туризмі бағытында 868 203 адам келді. 2022 жылы 726 545 адам саяхатшы келген болатын. Экологиялық туризм бағытында 123 176 адам келген. Ал былтыр 67,4 мың адам келгенін ескерсек, келушілер саны 2 есе артып отыр. Еліміз ғана емес, Түркі әлемі үшін Түркістан өңірі мен тарихи Түркістан қаласының орны бөлек. Туризм саласындағы жұмыстар жалғасады, – деді Дархан Сатыбалды.
Өңірде бұл сала тарихи-танымдық, экологиялық және емдік-сауықтыру туризмі болып, нақты 3 бағытта дамып келеді. Облыс аумағында 1770 тарихи ескерткіш, 220 қонақүй, 72 шипажай жұмыс атқарады. Соңғы 5 жылда өңірде 72 қонақүй, 29 шипажай пайдалануға берілген. Ал туризм саласына тартылған инвестиция көлемі 363 млрд. теңгеден асып отыр. Сондай-ақ инфрақұрылымды жетілдіру бойынша бірқатар жұмыстар атқарылуда. Мәселен 2019-2022 жылдарда жалпы соммасы 26,7 млрд. теңгені құрайтын инфрақұрылымдық жобалар жүзеге асырылған. Қазіргі таңда 34,4 млрд. теңгеге инфрақұрылымдық жобалар қолға алынған. Жобалардың аяқталуы 2025 жылға дейін жоспарланған.
Түркістан қаласында мәдени-рухани арнайы аумағы құрылды. Аумақта «Ұлы Дала Елі» орталығы, Шығыс моншасы, амфитеатр, музыкалық субұрқақ, Қабылдау орталығы секілді мәдени нысандар бой көтерді. Сонымен қатар Түркістан қаласында тәуелсіз Қазақстанда алғаш рет әуежай құрылысы жүргізілді. Халықаралық туризм және меймандостық университеті ашылды, «Керуен сарай» туристік кешені саяхатшыларға қызмет көрсетуде.
Келуші туристер санын арттыру мақсатында биыл Түркістан-Ташкент-Нурафшан бағытында халықаралық автобус рейсі ашылды. Алдағы қаңтар айынан бастап Біріккен Араб Әмірлігіне Түркістан — Абу Даби халықаралық тұрақты әуе рейсі іске қосылады. Облыста туризм саласында жұмыс атқаратын адамдар саны 17 мыңға жетті.
Түркістан облысы әкімінің баспасөз қызметі

ХАЛЫҚАРАЛЫҚ ӨНЕР ЖОБАЛАРЫ ТҮРКІСТАНДЫ ТАНЫМАЛ ЕТЕДІ

OKnews OKnews — Sat, 21 Oct 2023 07:42:48 +0000

Түркістан облысының әкімі Дархан Сатыбалды «Voice of Turan — 2023» халықаралық қазақ әндері фестивалінің қонақтарымен кездесті. Жиынға байқауға төрелік ететін қазылар алқасы мен өнер майталмандары және ән додасында бақ сынайтын 15 шетелдік әнші қатысты.

– Түркі әлемінің рухани орталығына айналған қасиетті Түркістан қаласында қазақ өнерінде қолтаңбасы бар өздеріңіздей тұлғаларды, әлемнің әр қиырынан келген талантты жастарды көргеніме шын қуаныштымын. Өздеріңізге белгілі, қазіргі таңда Түркістан ерекше қарқынмен дамып келеді. Ежелден Түркі елдері үшін рухани орталық, тарихи астана ретінде әспеттелетін шаһардың жаңа тынысы ашылып, оң өзгерістер болып жатыр. Биыл Түркістан облысының құрылғанына 5 жыл толды. Мемлекет басшысының бастамасымен қаламызға ерекше мәртебе беріліп, жаңа мүмкіндіктерге жол ашылып отыр. Түркістан Түркі әлемінің 2024 жылғы туристік астанасы болып жарияланды. Бұл бастамалар өңірдің мәдени-рухани, туристік әлеуетінің артуына оң серпін беретін қадам деп білемін. Қазіргі таңда Түркістанда мәдениет пен өнерге айрықша көңіл бөлініп келеді. Руханиятты дамытуға арналған тың жобалар іске асуда. Өнер саласында Түркістанның өз брендін қалыптастыруды тапсырдым. Халықаралық өнер жобалары Түркістанды таныта түседі. «Voice of Turan» қазақ әндерін орындаушылар байқауы аз ғана уақытта жоғары деңгейдегі танымал жобалардың қатарына енді. Ән додасына әлемнің әр қиырынан келген әншілер арқылы халқымыздың әндері әлемдік сахналарда шырқалатыны анық. Осы байқаудың ықпалымен қазақ тілінің, руханиятының мәртебесі биіктейді деп сенемін! – деген облыс әкімі кездесу барысында мәдениетті дамыту бағытындағы ұсыныстарды тыңдап, бірлесе жұмыс атқаруға дайын екенін жеткізді.

Кездесуде композитор, Қазақстан Республикасының Мемлекетік сыйлығының лауреаты Төлеген Мұхамеджанов Түркістанда мәдени бағытта ауқымды жобалар тұрақты түрде өтіп жатқанын атап өтті. Өнер қайраткері Нұрғиса Дәуешов пен ақын Қалқаман Сарин де өнер, мәдениет саласындағы жұмыстарды жандандыру бағытындағы ойларын ортаға салды. Өнерге қолдау көрсеткен өңір басшысына алғыстарын жеткізді.

Шетелдік әншілер Түркістан қаласының көрікті екеніне тоқталып, байқау арқылы Қазақстан туралы, мәдениеті туралы мол мағлұмат алғандарын айтты.

Түркістан облысында республикалық, халықаралық деңгейдегі симпозиумдар, өнер фестивалдарын жүйелі түрде өткізуді жоспарланған. Таяуда ғана облыс әкімінің тапсырмасымен «Конгресс холл» кешеніне 100 штат беріліп, жаңа, жас өнер мамандары жұмысқа қабылданып жатыр. Мұның барлығы өңірдің тарихи маңыздылығын арттыра отырып, мәдени өміріндегі жаңа белестерге жол ашады. Соның бірі – «Voice of Turan» халықаралық қазақ әндерін орындаушылар байқауы. Қазақ әндерін және қазақ тілін әлемдік деңгейде насихаттауды мақсат еткен фестиваль бүгінде халықтық мерекеге айналып үлгерді.

Түркістан облысы әкімінің баспасөз қызметі

Мемлекет басшысы Қауіпсіздік Кеңесінің отырысын өткізді

OKnews OKnews — Thu, 12 Oct 2023 05:25:51 +0000

Қасым-Жомарт Тоқаевтың төрағалығымен Қазақстан Республикасы Қауіпсіздік Кеңесінің отырысы өтті. Жиында азық-түлік қауіпсіздігін қамтамасыз ету жөніндегі проблемалар қарастырылды.

Отырыс барысында елдің азық-түлік тәуелсіздігін нығайтуға қатысты бірқатар мәселе талқыланды.

Жиынның күн тәртібіне сәйкес Премьер-Министрдің орынбасары Серік Жұманғарин сөз сөйледі. Сондай-ақ қабылданған және жоспарланған шаралар туралы бірқатар уәкілетті мемлекеттік орган басшылары есеп берді.

Талқылау нәтижесі бойынша Мемлекет басшысы халықты қолжетімді әрі сапалы азық-түлікпен қамтамасыз ету мәселесін негізгі басымдық ретінде атап өтті.

Азық-түлік тауарларын өндіру мен сатудың барлық сатысында баға белгілеудің ашық болуы, өнімсіз делдалдармен күрес жүргізудің маңызды екеніне назар аударылды.

Демографиялық үрдістерді ескере отырып, азық-түліктің физикалық тұрғыда қолжетімділігінің перспективалары еңбек өнімділігінің өсуіне, ауыл шаруашылығы мен отандық аграрлық ғылымның жаңғыруына тікелей байланысты екені атап өтілді.

Жерді тозудан қорғау шараларын жандандыру өзекті мәселе болып отыр. Сондай-ақ ауыл шаруашылығы техникасы паркін жаңарту процесін жүйелі түрде ұйымдастыру және жергілікті жағдайға бейімделген меншікті тұқым қорын құру үшін жаңа тәсілдер қажет.

«ЖАҢАРҒАН ЖЕР, БАҚ ҚОНҒАН ЕЛ –ТҮРКІСТАН!» МЕРЕКЕЛІК КОНЦЕРТІ ӨТТІ

OKnews OKnews — Thu, 12 Oct 2023 04:02:14 +0000

Түркістанда жаңадан ашылған «Мұз сарайы» алдындағы ашық алаңда «Жаңарған жер, бақ қонған ел –Түркістан!» атты мерекелік концерті өтті. Бес жылдық белеске арналған кешке облыс әкімі Дархан Сатыбалды арнайы қатысып, қала тұрғындары мен қонақтарды құттықтады.

– Баршаңызды Түркістан облысының құрылғанына 5 жыл толуымен шын жүрекпен құттықтаймын! Осы мерекеге арналған бүгінгі өнер кеші – қала тұрғындары мен қонақтарына тамаша тарту болғалы тұр. Қазіргі таңда Мемлекет басшысы Қасым-Жомарт Тоқаевтың бастамасымен Түркістанға ерекше мәртебе беру бағытында жұмыстар жүргізіліп жатыр. Бүгінгі ғана бауырлас Түркия, Әзербайжан, Мажарстан, Қырғызстан және Өзбекстан елдерінің қатысуымен Түркі елдері ұйымының форумы басталды. Онда Түркістан – 2024 жылға Түркі әлемінің туристік астанасы болып жарияланды. Баршаңызға құтты болсын айтқым келеді. Бұл – өңірдің одан әрі дамып, туристік әлеуетінің артуына оң серпін беретін қадам деп білемін. Түркістанның мұндай маңызды міндетті алуы – түркітілдес бауырлардың ыстық ықыласы деп түсінемін. Қазақ хандығының астанасы атанған қаланың жауһарына айналған Қожа Ахмет Ясауи кесенесі мен басқа да ежелгі нысандар туристердің Түркістанға деген қызығушылығын арттырады. Алдағы уақытта да Түркістан тек еліміздің ғана емес, Түркі әлемінің рухани шамшырағы ретінде жарқырайтын болады. Айтулы мереке қарсаңындағы өнер кеші сіздерге рухани демалыс сыйлайды деп сенемін, – деді облыс әкімі.

Қазіргі таңда өңірде мәдениет пен өнерге айрықша көңіл бөлініп келеді. Руханиятты дамытуға арналған тың жобалар іске асуда. Оның ішіндегі кәсіби театрлар еңбегі айрықша. Сонымен қатар биыл «Түркістан дауысы» ән байқауы, Түркі тілдес елдердің анимациялық көрмесі, Түркі әлемінің этноподиумы сынды ауқымды жобалар қолға алынған болатын. Ал 19-20 қазан күндері «Voice оf Turan» халықаралық байқауы өтпек. Онда шетел әншілері Қазақ әндерін орындайды. Қараша айында республикалық театрлар фестивалін өткізу жоспарлануда.

Мерекелік кеш Қазақстанның халық әртісі Роза Рымбаеваның «Түркістан» әнімен ашылды. Сонымен қатар Нұрболат Абдуллин, Мархаба Сəби, Дастан Оразбеков, Айя Шәріп, Сара Амангелді, Kyle Ruh, «Алатау серілері» сынды танымал жұлдыздар өнер көрсетіп, көпшілікке көтеріңкі көңіл-күй сыйлады.

Президент жарлығымен 2018 жылдың 19 маусымында Түркістан облысы құрылған болатын. Бұл тарихи шешім өңірге жаңа серпін берді және жан-жақты даму мүмкіндіктеріне жол ашты. Осынау аз ғана уақыт ішінде Түркістан өңірі түлеп, жаңаша кейіпке еніп үлгерді. Тарихы тереңде жатқан шаһардың жаңа дәуірі басталып, жүздеген нысан бой көтерді.

Түркістан облысы әкімінің баспасөз қызметі

Президент әлем чемпионы Ризабек Айтмұханды жеңісімен құттықтады

OKnews OKnews — Sat, 23 Sep 2023 05:26:54 +0000

Мемлекет басшысы Қасым-Жомарт Тоқаев әлем чемпионы Ризабек Айтмұханды жеңіске жетуімен құттықтады. Бұл туралы BAQ.KZ Ақорданың баспасөз қызметіне сілтеме жасап хабарлайды.

Еркін күрес шебері Ризабек Айтмұқанды Белградта өткен күрес түрлерінен әлем чемпионатында алтын медаль иеленуімен құттықтаймын! Ол қазақ балуандары арасында тұңғыш рет әлем чемпионы атанды. Бұл – тарихи жетістік. Ризабек Айтмұқанның жарқын жеңісі жас буынның спортқа құлшынысын арттырады деп сенемін, – деді Президент.

Кеше Сербия астанасы Белград қаласында күрестен әлем чемпионатында қазақ балуаны Ризабек Айтмұхан финалда Осман Нурмагомедовты жеңіп, алтын медаль иеленді.

ШАРДАРАДА ЖЫЛЫНА 150 МЫҢ ТОННА ЖҮГЕРІ ӨҢДЕЙТІН ЗАУЫТ ІСКЕ ҚОСЫЛУҒА ДАЙЫН

OKnews OKnews — Sat, 23 Sep 2023 05:05:53 +0000

Түркістан облысының әкімі Дархан Сатыбалдының бастамасымен қолға алынған жүгері өңдеу зауыты іске қосылуға дайын. Биыл наурыз айында инвесторлардың қаржысымен құрылысы басталған өндіріс орны жылына 150 мың тонна жүгері дәнін терең өңдеуге қауқарлы.

Жобаның жалпы құны — 31 миллиард теңгеге бағаланған зауыт 550 адамды тұрақты жұмыс орнымен қамтиды деп жоспарланған. Ауыл шаруашылығының дамуына айтарлықтай әсерін тигізетін зауыттың құрылысы 2 кезеңнен тұрады. 2023 жылдың аяғына дейін жүгері сақтау және кептіру кешенінің құрылысын аяқтау көзделіп, қазіргі таңда іргетас құю жұмыстары толықтай аяқталған. Сонымен қатар, әрлеу жұмыстары да басталып кеткен. Ал, екінші кезеңде жүгеріні терең өңдеу зауытының құрылысы 2024 жылы басталып, 2025 жылы толықтай пайдалануға берілмек.

Естеріңізге сала кетейік, Түркістан өңірі алдағы уақытты мақта өндірумен ғана емес, жүгері өндірісмен де айналысуды бір арнаға қоймақ.

Түркістан облысының Өңірлік коммуникациялар қызметі

ШЫМКЕНТТЕ АВТОБУС ЖҮРГІЗУШІСІНЕ ҚАТЫСТЫ СОТ БАСТАЛДЫ

OKnews OKnews — Sat, 23 Sep 2023 04:47:54 +0000

Шымкентте автобусты қараусыз қалдырып, бес адамның өліміне себепші болған жүргізушіге қатысты сот басталды. Бес айға созылған тергеуден кейінгі сот талқылауына марқұмның ата-аналары мен жақындары толық қатысты. Олар автобусты жол бойында қалдырған жүргізуші лайықты жазасын алсын дейді. Әрі ақауы бар көлікті бағытқа шығарған автобус паркін де кінәлап отыр. Айта кетейік, 24 жыл қоғамдық көлік айдаған азамат далаға шығып кеткен сәтте автобус жүріп кетіп, жол жиегінде тұрған алты жолаушыны қағып өткен болатын.

Басқарусыз қалған автобус апаты кезінде жалғыз перзентімнен айырылдым деген Алтынай Тұңғатаева үшін сол сәтті еске алудың өзі ауыр. Алғашқы сот отырысының өзіне ауруханадан келген ол марқұм Азадхан Отапуллаеваның анасы. 28 жастағы жалғыз қызымды ұзату арманым еді деген кейуана енді оның сол күйі орындалмайтынын айтып жылады.

АЛТЫНАЙ ТҰҢҒАТАЕВА, марқұм Азадхан Отаппулаеваның анасы:

«Мен бұл жерде шофердің кінәсі деп ойлаймын. Рычагын қойып сөйту керек қой. Адам сияқты. Жазықсыз қызым кетті. Асыраушым. Барым да еді. Қатаң жазасын алсын. Бес адамның қаны кетіп отыр ғой. Шофер жазықсыз дегенге сенбеймін.

Азадханмен бірге жолдан 5 баланың анасы Азиза Егізбаева, 24 жастағы Айсана Тұрғынбаева, 9-сынып оқушысы Алина Жолдасбек, 10-сынып оқушысы Танила Теңгебаева мен құрбысы Дариға Сейдалиева да өтпек болған. Олардың арасында тек 11 сынып оқушысы Дариға ғана аман қалды. Қара жамылған бес әулеттің мүшелері апатқа автобус паркінің де айыбы бар дейді.

ӘБДІРАЙЫМ АЛТЫНБЕКҰЛЫ, Марқұм Айсана Тұрымбетованың ағасы:

«Бес адамның өмірі кетіп отыр ғой. Екі қыз оқушы ғой әлі. Ойбай-ау, оқушы ғой әлі. Он күнде бір гүлі ашылмады»+»Жаңадан келген автобус дейді. Жаңадан келген автобусты тексеріп шығады ғой. Неге оны олар қарамайды? Бір күнде азаннан кешке дейін машина бұзылып қалмайды. Яғни ол ақауы бар.

НАЗЕРКЕ ҮКІБАСОВА, тілші:

– Еске салайық, 6 сәуір күні Шымкентте жол бойында басқарусыз қалған қоғамдық көлік жүріп кетіп, жолдан өткелі тұрған 6 адамды қаққан еді. Сол кезде дәретханаға кеткен жүргізушінің үстінен Қылмыстық кодекстің 345, яғни «Абайсызда екі немесе одан көп адам өліміне әкеп соққан іс-әрекет» бабы бойынша іс қозғалды. Хайрулла Юлдашев бүгін сот отырысында өз кінәсін мойындады. Ал 49 жастағы сотталушының қорғаушысы көлікте техникалық ақау да болуы мүмкін дейді.

БАҚЫТЖАН САТЫБАЛДИЕВ, сотталушының адвокаты:

– Автобус күні бойы жүргенде тормозной колоткілері істемей қалуы мүмкін. Қызған салдарынан»+ «Қазіргі таңда жәбірленушінің тарапы айтып отыр. Автопарк басшысы бізге келіп кешірім сұрап 5 миллион берді. Әрқайсымызға. Біз ешқандай шағым жоқ. Моральдық, материалдық ущерб бәрі берілді деп отыр. Егер автопарк кінәлі болмаса, 5 миллион не үшін береді?

НАЗЕРКЕ ҮКІБАСОВА, тілші:

– Енді жүргізушінің кінәсі дәлелденсе 5 жылдан 10 жылға дейін бас бостандығынан айырылады. Айта кетейік, апаттан аман қалған жалғыз жәбірленуші Дариға Сейдалиева мүгедектігін дәлелдей алмай жүр. Осылай деген адвокаты сотталушыдан 6 миллион 300 мың теңге материалдық және моральдық шығын сұрады. Ал, автобус паркі қара жамылған отбасының әрқайсысына 5 миллион теңгеден берген.

Дереккөз: Информбюро