Кеңесте Премьер-Министр Серік Ахметов, Қоршаған ортаны қорғау министрі Нұрлан Қаппаров және «Астана ЭКСПО-2017» Ұлттық компаниясы» АҚ басқарма төрағасы Талғат Ермегияев атқарылған жұмыстар туралы есеп берді.

Нұрсұлтан Назарбаев Астанаға бүкіләлемдік көрме өтетін алаң ретінде таңдау түскен кезден бастап бір жылдай уақыт өткенін, ЭКСПО-2017 халықаралық көрмесіне дайындық барысын қарап, тіркеу мәліметін әзірлеп, өзге де ұйымдастырушылық-құқықтық мәселелерді шешкен жөн екенін айтты.

Мемлекет басшысы ЭКСПО-2017 көрмесіне қаржыландырудың өзге көздерін, соның ішінде корпоративтік қатысушыларды – әлемдік деңгейдегі компанияларды тартудың маңыздылығын, мұның көрмеге дайындық жасау жөніндегі жұмыстың негізгі бағыттарының бірі болуға тиіс екенін атап өтті.  Бұған қоса, Қазақстан Президенті дәл осы ЭКСПО-2017 көрмесі аясында жаңа жоғары технологиялық әзірлемелер таныстырылымын өткізу қажеттігіне тоқталды.

– Мен бірінші күннен көрмені өткізуде ысырапқа жол берілмеуін айтып келемін. Осы орайда салынған барлық инфрақұрылымның көрмеден кейін де пайдаға асуы маңызды мәселе болып қала бермек. Көрме еліміздің әр азаматына қолжетімді болып, оны аралап шығуларына мүмкіндік жасалуға тиіс, – деді Нұрсұлтан Назарбаев.

Мемлекет басшысы интернеттегі, әлеуметтік ресурстар мен БАҚ-тағы тиімді және шығын аз жұмсалатын жарнама есебінен алға қойған міндетті орындауда ақпараттық-имидждік жұмысты жүзеге асыруда жаңашыл қадамдар қажеттігіне назар аударды.

Кеңес барысында Премьер-Министр көрмеге дайындық Мемлекет басшысының тапсырмасына және Ұлттық жоспарға сәйкес жүргізіліп жатқанын баяндады, сондай-ақ барлық аталған мәселе Үкімет пен Ұлттық комиссияның ұдайы бақылауында екеніне тоқталды.

Қоршаған ортаны қорғау министрі көрменің жалпы аумағы 173 гектар болатынын және онда әртүрлі инфрақұрылымдық нысандар орналасатынын баяндады. Бұған қоса, көрменің аумағы Астананың орнықты энергетиканы дамыту жөнінде көшбасшы болуына мүмкіндік беретін үшінші индустриялық революцияны іс жүзіне асыратын әлемдегі бірінші ауданға айналмақ.

Кеңес соңында Мемлекет басшысы Adrian Smath + Gordon Gill Architecture компаниясы әзірлеген көрме кешенінің архитектуралық эскизін мақұлдады.

Ақпарат көзі: www.akorda.kz

4 және 7 қараша аралығында Лондонда World Travel Market (WTM) Бүкіләлемдік туристік көрмесі өтіп жатыр. Аталған іс-шара 184 ел мен өңірлерден 5000 астам қатысушыларды еліктіруде. Аталған іс-шара аясында Астана қаласында өтетін ЭКСПО-2017 Халықаралық мамандандырылған көрмесінің таныстырылымы өткізілді.

Биылғы жылы Қазақстан атынан Индустрия және жаңа технологиялар министрлігі, Астана және Алматы қалаларының әкімдіктері, сонымен қатар түрлі туристік фирмалардан құралған делегация өкілдік етеді. «Астана ЭКСПО-2017» ҰК» АҚ алғаш рет қатысады. Көрме кезінде мүдделі тұлғалармен туристік индустрияға қатысушылармен диалогты жөнге салу үшін келіссөздер жүргізу жоспарлануда.

WTM-ге қатысу тек Астана қ. мен ЭКСПО-2017 танымалдылығын көтеруге мүмкіндік беріп қана қоймай, сондай-ақ Қазақстан Республикасы туризмін шетелде одан әрі дәріптеу үшін әлемдік туристік компаниялармен ынтымақтастықты орнатуға жәрдем береді. ЭКСПО көрмесі елдің басты туристік назар аударарлық нысандарының бірі болады. Шетелдік туристерді тарту мақсатында түрлі мақсатты топтар үшін арнайы турпакеттер әзірленетін болады. WTM-ге келушілер ЭКСПО-2017 көрмесі сияқты оқиғаның маңыздылығын атап өтті. Мирослав Рончак (Германия): «ЭКСПО-207 Қазақстанға туризмнің кең ағымын еліктіреді және елдің дамуын көруге мүмкіндік береді, сондай-ақ одан әрі дамудың көзі бола алады». Сол уақытта көрменің итальяндық қонақтары да 2015 жылы ЭКСПО-ны өткізетін Милан мен Астана арасындағы ынтымақтастықтың тиімді жақтары жөнінде өз пікірлерін айтты.