назарбаев — OKnews.kz

Елбасы «Шымкент-Түркістан» учаскесінде көлік қозғалысына рұқсат берді

OKnews OKnews — Fri, 20 Dec 2013 11:20:36 +0000

Н.Назарбаев «Батыс Еуропа — Батыс Қытай» автожолының «Шымкент-Түркістан» учаскесінде көлік қозғалысына рұқсат берді.

«Батыс Еуропа — Батыс Қытай» автожолының «Шымкент-Түркістан» учаскесінде жол қозғалысы жанданды. Бүгін елордадағы Тәуелсіздік сарайында өтіп жатқан «Индустрияландыру күні» барысында Елбасы Нұрсұлтан Назарбаев аталған учаскенің ашылуына рұқсат берді.Оңтүстік Қазақстан облысынан тікелей байланысқа шыққан ҚР Көлік және коммуникация вице-министрі Мереке Пішембаевтың атап өтуінше, биыл ҚР Президентінің тапсырмасымен салынып жатқан «Батыс Еуропа — Батыс Қытай» автомагистралінің 806 шақырымы аяқталған. Бүгінгі таңда құрылыс жұмыстары 5 облыста жүргізілуде. Жол салуға 35 мың адам қатысуда. Жаңа жол бойында заманауи қызмет көрсету орындары ашылып жатыр. «Құрметті Нұрсұлтан Әбішұлы! Бүгін көлік дәлізіне қарасты учаскелердің бірінде, яғни, Шымкент бағытынан Түркістан қаласына қарай автомобиль жолының бірінші учаскесінде қозғалысты ашуға рұсқат беруіңізді сұраймыз», — деді.Өз кезегінде Елбасы Нұрсұлтан Назарбаев барша оңтүстікқазақстандықтарды осы айтулы шарамен құттықтай келе: «Жол құтты болсын! Жаңа ғана Каспийге түсірілген 2 кемеге ат бердік. Біреуінің аты — Түркістан, Қожа Ахмет Яссауи — біздің рухани қазынамыз. Екіншісінің аты — Бекет ата. Солардың аруағы бізді қолдап жүрсін дегім келеді. Рұқсат», — деді Мемлекет басшысы.ҚазАқпарат

Елбасы ЭКСПО-2017 архитектуралық эскиз-идеяларымен танысты

Редактор — Sun, 18 Aug 2013 07:06:09 +0000

Қазақстан Президентіне әлемнің түрлі елдерінен архитектуралық конкурсқа қатысқан 50-ге жуық маманның жұмысы таныстырылды. Оның идеясына болашақ көрме кешенінің көрінісі, сондай-ақ ЭКСПО-2017 халықаралық мамандандырылған көрмесінің символы енгізілген.

Жобалармен танысып шыққан Нұрсұлтан Назарбаев ЭКСПО-2017 көрмесін өткізу Қазақстан үшін тарихи оқиғаға айналатынын атап өтті.

– Әлемнің көптеген мемлекеттері арасынан біздің еліміз көрмені өткізу құқығын жеңіп алды. Кешен Астанадағы және бүкіл Қазақстандағы ауқымды нысандардың біріне айналады. Осыған байланысты түрлі жобаларды қарастыру керек. Біз конкурсқа қатысқан қазақстандық және шетелдік барлық архитекторларға, үздік жобаларды таңдап алатын комиссия мүшелеріне алғыс айтамыз. Көрме өткеннен кейін құрылыстарды, соның ішінде тұрғын үйлерді, қызмет кеңселерін, сауда ғимараттарын, ғылыми зертханаларды пайдалануды қамтамасыз ету қажет, – деді Мемлекет басшысы.

Қазақстан Президенті таңдау қорытындысының маңыздылығына тоқталды.

– Біздің көрменің тақырыбы әрбір құрылыста энергияның баламалы көздерін пайдалану, жылумен және сумен дербес қамтамасыз ету мүмкіндігін қарастыратын «жасыл экономикамен» тығыз байланысты, – деді Нұрсұлтан Назарбаев.
Сонымен қатар, Мемлекет басшысы ұсынылған өтінімдерден көрменің негізгі параметрлері, тиісті тұжырымдамасы ескерілетін «жоба-симбиоз» қалыптастыру мүмкіндігі бар екенін атап өтті.

Конкурсқа 20 елден – Австрия, Австралия, Ұлыбритания, Германия, Испания, Италия, Канада, Қытай, АҚШ, Нидерланды, Корея, Ресей, Португалия, Норвегия, Түркия, Тунис, Жапония, Франция, Украина және Қазақстаннан алдын ала жүзден астам өтінім келіп түсті.

Архитектуралық конкурс Миланда, Сарагоседе, Сан-Паулуда өткен ЭКСПО көрмелері кешендері мен объектілерін жобалаудағы табысты тәжірибелері бар шеберлердің назарын аударды.

ЭКСПО-2017 көрмесінің жобасы үшін идеяны Астананы жобалауда табысты тәжірибелері бар шетелдік архитекторлар мен компаниялар – Манфреди Николлети («Қазақстан» киноконцерт залы), «Студия-44» (Оқушылар сарайы), «Сембол» компаниясы («Хан Шатыр» ойын-сауық орталығы) және өзгелері де ұсынды.

Қатысушылар арасында елімізден Қазақстан қала құрылысы одағы, «KAZGOR» жобалау академиясы, Қазақстан дизайнерлер одағынан Тимур Сүлейменов, Қазақстан архитекторлар одағынан архитектор Сәкен Нарынов шеберханасы, ЕҰУ «Этноархитектура ҒЗИ»-мен бірлескен «Қазөркенжоба» ЖШС және тағы басқалар бар.

Конкурсқа қатысушылардың жұмысы белгілі экономист, Экономикалық үрдістерді зерттеу қорының президенті Джереми Рифкин басшылық жасаған техникалық кеңестің бағалауынан өтті. Кеңес құрамына орнықты даму және энергия тиімділігі саласындағы белгілі архитекторлар мен мамандар енді.

Сонымен қатар, көрме орталығын аралау барысында Мемлекет басшысы «Жасыл орам» жобасы тұжырымдамасымен және жобалық үлгісімен танысты.
Алаңы 100 гектардан кем емес «Жасыл орам» аумағында әкімшілік-іскерлік орталық, тұрғын үйлер ауданы, саябақтар мен мәдениет нысандарын орналастыру жоспарлануда. Осы орайда бүкіл құрылыста энергия тиімділігі саласындағы жаңа әзірлемелер қолданылатын болады.

Қорытындыда Мемлекет басшысы бір ай ішінде конкурс нәтижесін шығару және ЭКСПО-2017 көрме кешені үшін негіз бола алатын эскиз-идеяны анықтау жөнінде бірқатар нақты тапсырмалар берді.

Ақпарат көзі: Ақорда

Мемлекеттің мүддесі

Редактор — Sat, 08 Dec 2012 05:03:58 +0000

«Жастық шақ – адам өмірінің ең қызықты, қайрат-жігерге толы керемет кезеңі. Бойға қуат, ақылға көз берген таңғажайып мүмкіндіктерімен қоса жасалған қателіктерді де түзетуге таптырмайтын уақыт. Біздің елімізде осы бір алтын уақыттың аралығы 14 пен 29 жас деп ресми белгіленген. Жүзеге асырылу үстіндегі жастар саясаты да осы кезең аралығындағы жастарға арналған.

Жалпы, жастар саясатын жүргізу кез келген ел үшін жеңіл емес. Өйткені жастар саясатын жүргізудің шығыны мол, әрі ол шығын бірден қайта қоймайды. Сондықтан болар нақ осы мәселемен мемлекет деңгейінде айна-лысатын елдер әлемде өте санаулы. Олардың бірінде өз жастарына мемлекеттік деңгейде қамқорлық жасауына мүмкіндігі жоқ болса, енді бірінде қоғамдық құрылыс пен ділінің деңгейі басқаша құрылған. Мәселен, Америкада әлі күнге дейін жастар туралы мемлекеттік саясат жоқ. Олардың жастары жекеменшік, соның ішінде қайырымдылық, демеушілік қорларына үміт артады. Сарапшылардың айтуынша, әлем бойынша жастар саясатымен белсенді шұғылданатын елдердің бірі Германия екен. Бұл елдің жастарында заңда белгіленген қамқорлық негізінде білім алып, емделумен қоса басқа да әлеуметтік жағдайлар жасалған.
Жастар саясатымен белсенді түрде айналыса бастаған елдердің бірі – біздің Қазақстан. Жастардың тегін орта білім алуы, мемлекеттік грант, «Болашақ» бағдарламасымен шетелде оқуы, дипломмен ауылға барған жастарға берілетін көтерме жәрдемақылар және жастар өміріне позитивті сипат беретін 70-тен аса мемлекеттік деңгейдегі жобалар бәрі де қайтсек келешегімізді кемел етеміз деген тілектің аясында жасалып отыр. Мұны Елбасы да «Жастар – ертеңімізді жасайтын бүгініміз» деп үнемі айтып келеді. Нақты тапсырмалар нәтижесінде жүзеге асырылып жатқан шаруалар да соның айғағы.
Міне, Сыр бойы журналистикасына жаңа серпін берсе деген тілекпен, үлкен үмітпен өздеріңізге «Ақмешіт жастары» басылымын ұсынып отырмыз. Облыс әкімі Қырымбек Елеу¬ұлының жастармен кездесуіндегі ұсыныс-тілектен туған идея жүзеге асып, қолыңызға алдыңыз. Мұны біз қоғамның қозғаушы күші саналатын жастарға артылған зор сенім деп білеміз. Бұл басылым сіз бен біз болып үн қосатын, мемлекеттің мүддесі жолында қызмет етуге шақыратын мәртебелі мінбер болады деп үміт етеміз. Елдің бәрі ғаламторға үңіліп, керек дерегін іздейтін осы бір жылдам ақпарат кезеңінде бізді де парақтауға уақыт табыңыз. Қолыңызға қалам алып, көкейтесті сауалдар жолдап, қолдау білдіріңіз.
Бұл – сіздің газетіңіз, сырбойылық жас дос!

Айжан Абдуллаева