ОҚО Отырар ауданындағы шәуілдірлік ерлі-зайыпты кәсіпкерлер сауын сиырларды әр күні екі мезгіл сауып, «Отырар-Сүт» ЖШС-не күніне өздерінің ішіп-жемінен бөлек 100 литр сүтімен қоса етін де өткізіп, отбасы тәп-тәуір қаржы тауып отыр. Табыспен қатар қиыншылықтың да бірге жүретіні белгілі. Оның күнделікті жемшөбін беру, қора-жайды таза ұстау, түрлі ауруларға байланысты дер кезінде вакциналар салдыру сияқты жұмыстар адамға көп күш-жігер жұмсауын талап етеді. «Еңбек етсең ерінбей, тояды қарның тіленбей» деген қағиданы ұстанған Беркінбаевтар отбасының аянбай атқарған еңбегінің өтеусіз қалмайтынына сенімдері зор. Сиыр бағудың өзіндік қиындықтары да барын айтқан кәсіпкер “ауылда жұмыс жоқ” деп сылтау айтатындарға ренжиді. Себебі, шағын кәсіп иесі дәл қазір нақты жалақыға сауыншы таба алмай отырғандығына қынжылды. Жұмыстың жоқтығын сылтау ететін ауыл азаматтарына бұл да болса құлаққағыс. Әкелінген сиырлардың арасында таудың салқын ауасына үйренгендері, жазды күндері біздің ауданның аптап ыстығына шыдай алмайтындары тағы бар. Оларды күз, қыс айларында сауып, көктемде бордақылап, жазда тұтынушыларға етке өткізеді. Бұл да өз кезегінде кәсіпкердің табысын молайтатындығы сөзсіз.-«Елбасымызға рахмет, кәсіпкерлерге, кәсібін ашып, дөңгелетем дегендерге мүмкіндікпен қатар мол қаржы да беріліп отыр. Алда қора-жайды кеңейтіп, сиырлардың басын көбейту жоспарымызда бар. Осы кәсібіміздің арқасында несібемізді тауып, бала-шағамызды асырап отырмыз. Береке байлықта өмір сүру үшін адам ерінбей еңбек етуі тиіс. дегендей қолымыздан келгенше тіршілігімізді жасаудамыз, алдағы таңда тағы 15 сиыр тұратын жай салуды көздеп отырмыз»,- дейді кәсіпкер. Сөз соңында жұмыс жасаймын, кәсіп ашамын деген азаматтарымызға мемлекет тарапынан жан-жақты қолдау көрсетіліп, қолдан келгенше көмектер берілуде. Осының бір жарқын мысалы аудандық кәсіпкерлік мектебінде бизнесті қолға алып, одан әрі дамытам дегендерге арнайы бір айлық сабақтар өткізіліп, кәсіпкерліктің қыр-сырына қанығып, несие алуға мол мүмкіндіктер жасалуда. Мемлекет ұсынған жеңілдіктер мен көмектерді ұтымды пайдаланайық, ағайын!
Шолпан Дүтбаева.
Кәсіпкерліктен несібе тауып отыр…
